Dili - Sandra McGuire, Xefe Komunikasaun no Ofisiál Informasaun Públika UNMIT nian fo sai komunikado ba imprensa ida via internet ba Jornalista sira, 19 Maiu 2011, rejeita total dokumentu neebe sita husi Jornal Tempo Semanal katak, Primeiru Ministru Xanana Gusmão sai obstakulu ba Governsaun Demokratiku iha Timor Leste no mos ba konstitusionalizmu.
“Haktuir liután ba ami-nia deklarasaun loron 18, fulan-Maiu nian, permiti ha’u atu hatete kategorikamente katak dokumentu ne’ebé sita hosi Tempo Semanal iha loron 15, fulan-Maiu la’ós nu’udar pontudevista ne’ebé asumi hosi UNMIT,” deklara iha karta komunikado nee.
Ami la fiar katak Primeiru Ministru sai nu’udar obstákulu ba governasaun demokrátiku iha Timor-Leste no mós ba konstitusionalizmu. Ami nota katak Sr. Gusmão ne’e nu’udar Primeiru Ministru ne’ebé eleitu demokratikamente, ne’ebé kontinua governa tuir prinsípiu demokrátiku, mak estabelese ho firme iha Timor-Leste. Prinsípiu sira-ne’e nu’udar rezultadu sakrífisiu sira hosi ema barak, partikularmente Sr. Gusmão nian.
Ami lamenta katak dokumentu ne’e hetan tratamentu hanesan dokumentu ida-ne’ebé reprezenta pontudevista sira UNMIT nian. Ami mós lamenta kona-ba ofensa ruma ne’ebé dokumentu ne’e hamosu. Ami goza tiha ona relasaun servisu ne’ebé di’ak no kordiál ho Governu Timor-Leste iha tinan barak nia laran. Ami hein atu kontinua hala’o relasaun di’ak hirak-ne’e. (*/falcao)
Tidak ada komentar:
Posting Komentar