SEKRETÁRIU-JERÁL: MENSAJEN KONA-BA LORON INTERNASIONÁL BA SOLDADU SIRA MANUTENSAUN PÁS NASOINS UNIDAS NIAN

29 Maiu 2011

Trajédia sira ne’ebé akontese tiha ona ba soldadu sira manutensaun pás Nasoins Unidas nian iha tinan ida ne’e sai nu’udar lembransa laran-susar nian ida kona-ba risku sira ne’ebé envolve iha sira-nia servisu importante ba pás. Bainhira ita selebra Loron Internasionál ba Soldadu sira Manutensaun Pás Nasoins Unidas nian, ita hato’o tributu ba militár, polísia no ema sivil liu na’in 120.000 ne’ebé serbí iha mundu tomak iha bandeira azul nia okos no hanoin hikas ema sira ne’ebé lakon sira-nia moris ba kauza pás nian.

Iha fulan sira foin lalais ne’e, Nasoins Unidas sofre tiha ona trajédia sira lubuk ida iha sekuensia ne’ebé lalais. Iha prinsípiu fulan-Abril, pesoál na’in ualu ema oho iha atake ida hasoru kompleksu ONU nian iha Afeganistaun. Somente iha loron balun tuirmai, ema na’in 32, sira barak ne’e nu’udar funsionáriu ONU, lakon iha asidente aviaun nian ida ne’ebé serbí operasaun manutensaun pás Nasoins Unidas nian iha Repúblika Demokrátika Kongu. Insidente sira ne’e aumenta tan ba insidente sira seluk ne’ebé envolve fatalidade sira iha mundu tomak, no tuir fali ho akontesimentu todan tinan kotuk, bainhira soldadu na’in 173 lakon sira-nia moris tanba dezastre natural, violénsia, asidente no moras, inklui liu ema na’in 100 mak lakon sira-nia moris iha golpe úniku no maka’as rai-nakdoko nian ne’ebé akontese iha fulan-Janeiru iha Haití.

Bainhira ita hanoin hikas sakrifísiu boot ita-nia pesoál sira-nian, ita mós sauda sira-nia rezultadu. Desde hosi fó apoiu ba referendum Sudaun Súl nian ba to’o tulun atu resolve krize pós-eleitorál iha Kosta-Marfín,  desde hosi apoiu fó formasaun, kapasitasaun no dezenvolvimentu institusionál ba polísia iha Timor-Leste ba to’o patrullamentu iha foho oan sira iha parte súl Líbanu nian, kapasete azul sira Nasoins Unidas nian reprezenta tiha ona Organizasaun ne’e iha nia esforsu di’ak: hodi restaura estabilidade, promove rekonsiliasaun no haburas esperansa ba loron-aban nian ida-ne’ebé di’ak liután.

Sira-nia kolokasaun sai nu’udar manifestasaun ba ita-nia konviksaun koletivu katak ema sira ne’ebé sobrevive tiha ona funu ida labele atu sofre tan periodu inseguransa, injustisa no tauk—no katak somente liuhosi muda sai tiha ona kondisaun sira-ne’e mak ita bele hamosu pás duradora.

Respeitu ba estadu direitu, tema ba Loron ida-ne’e nian ba tinan 2011, sai esensiál ba manutensaun pás ne’ebé iha susesu. Buat ida-ne’e ezije haforsa konfiansa ba iha polísia, sistema justisa no servisu prizaun nian.  Tanba ne’e mak  Nasoins Unidas fó treinu ba polísia atu labele abuza sia-nia poder, apoia funsionamentu regulár tribunal sira-nian hodi serbí justisa, no serbisu atu nune’e detensaun sira iha fatin ho kondisaun umana.

Iha loron Soldadu Manutensaun Pás Nasoins Unidas nian ida-ne’e, ne’ebé foka ba iha estadu direitu, ita agradese rai sira ne’ebé kontribui tropa, polísia no pesoál sivil ba ita-nia operasaun sira, no ita fó onra ba individuu sira ne’ebé serbí Nasoins Unidas ho distinsaun no dedikasaun. (*/falcao)